36 ലക്ഷം വര്‍ഷങ്ങള്‍ക്കിടയില്‍ ഭൂമിയുടെ ഭ്രമണവേഗത ആദ്യമായി കുറയുന്നു; വരാനിരിക്കുന്നത് വലിയ മാറ്റങ്ങള്‍

സമുദ്രനിരപ്പ് ഉയരുന്നതിനാല്‍ ഭൂമിയുടെ ഭ്രമണം മന്ദഗതിയിലാകുന്നതായി പഠനം. വിയന്ന സര്‍വ്വകലാശാലയിലെയും ETH സൂറച്ചിലെയും ഗവേഷകര്‍ നടത്തിയ പഠനത്തിലാണ് ഈ പുതിയ കണ്ടെത്തല്‍. ഇത്രയും വര്‍ഷങ്ങള്‍ക്കിടയില്‍ ഭൂമിയുടെ ഭ്രമണ വേഗതയില്‍ മാറ്റംവന്നിട്ടുളള മറ്റൊരു കാലഘട്ടം ഉണ്ടായിട്ടില്ലെന്ന് ശാസ്ത്രജ്ഞര്‍ പറയുന്നു. ഇത് സംബന്ധിച്ച ഗവേഷണം ജേണല്‍ ഓഫ് ജിയോഫിസിക്കല്‍ റിസര്‍ച്ചില്‍ പ്രസിദ്ധീകരിച്ചിട്ടുണ്ട്. 'ബെന്തിക് ഫോറമിനിഫെറ' എന്നറിയപ്പെടുന്ന ഏകകോശ സമുദ്രജീവികളുടെ ഫോസില്‍ അവശിഷ്ടങ്ങള്‍ ഉപയോഗിച്ചാണ് പകലിന്റെ ദൈര്‍ഘ്യത്തിന്റെ ഏറ്റക്കുറച്ചിലുകളെക്കുറിച്ച് ഗവേഷണം നടന്നത്.

സാധാരണയായി ചന്ദ്രന്റെ ഗുരുത്വാകര്‍ഷണ സ്വാധീനം മൂലമാണ് ഭൂമിയുടെ ഭ്രമണ വേഗത കുറയാറുള്ളത്. എന്നാലിപ്പോള്‍ ചൂട് കൂടുന്നതിനാല്‍ ധ്രുവപ്രദേശങ്ങളിലെ മഞ്ഞുപാളികള്‍ ഉരുകുന്നത് മൂലം ഭൂമിയുടെ ഭ്രമണം പതുക്കെയാവുകയും പകലിന്റെ ദൈര്‍ഘ്യം വര്‍ധിക്കുകയും ചെയ്യുന്നുവെന്നാണ് പഠന റിപ്പോര്‍ട്ടില്‍ പറയുന്നത്. ചൂടുമൂലം മഞ്ഞുരുകി ജലം ഭൂമധ്യരേഖാപ്രദേശത്ത് ഒഴുകിയെത്തുന്നു. ഇത് ഭൂമിയുടെ പിണ്ഡം മധ്യഭാഗത്തേക്ക് ക്രമീകരിക്കാനിടയാക്കുന്നു. അങ്ങനെ മധ്യഭാഗം വികസിക്കുമ്പോള്‍ ഭൂമിയുടെ ഭ്രമണവേഗത കുറയുകയും ദിവസം പൂര്‍ത്തിയാക്കാന്‍ കൂടുതല്‍ സമയമെടുക്കുകയും ചെയ്യുന്നു.കാലാവസ്ഥാ വ്യതിയാനത്തിന്റെ ഫലമായി ഗ്രഹത്തിലെ പിണ്ഡത്തിന്റെ വിതരണത്തിലെ ഏറ്റക്കുറച്ചിലുകള്‍ കാരണം, ഓരോ നൂറ്റാണ്ടിലും ഒരു ദിവസം ഏകദേശം 1.33 മില്ലിസെക്കന്‍ഡ് കൂടുതല്‍ നീണ്ടുനില്‍ക്കുമെന്ന് പ്രവചിക്കപ്പെടുന്നു.അതായത് ഒരു നൂറ്റാണ്ടില്‍ 1.33 മില്ലി സെക്കന്റ് എന്ന തോതിലാണ് ദിവസത്തിന്റെ ദൈര്‍ഘ്യം കൂടുന്നത്.

'പകലിന്റെ ദൈര്‍ഘ്യത്തിലെ ഈ ദ്രുതഗതിയിലുള്ള വര്‍ദ്ധനവ് സൂചിപ്പിക്കുന്നത്, കുറഞ്ഞത് 3.6 ദശലക്ഷം വര്‍ഷങ്ങള്‍ക്ക് മുമ്പ് പ്ലിയോസീന്‍ കാലഘട്ടത്തിന്റെ അവസാനത്തില്‍ നിന്ന് ഇപ്പോഴുള്ള ആധുനിക കാലാവസ്ഥാ വ്യതിയാനത്തിന്റെ നിരക്ക് അത്ഭുതമാണ് എന്നാണ്. അതിനാല്‍, പകലിന്റെ ദൈര്‍ഘ്യത്തിലെ നിലവിലെ ദ്രുതഗതിയിലുള്ള വര്‍ദ്ധനവിന് പ്രധാനമായും മനുഷ്യന്റെ സ്വാധീനം കാരണമാകാം'. ETH സൂറിച്ചിലെ സ്‌പേസ് ജിയോഡെസി പ്രൊഫസര്‍ ബെനഡിക്റ്റ് സോജ പറയുന്നു.

ഇരുപത്തൊന്നാം നൂറ്റാണ്ടിന്റെ അവസാനത്തോടെ, കാലാവസ്ഥാ വ്യതിയാനം ചന്ദ്രനെക്കാള്‍ ശക്തമായി പകലിന്റെ ദൈര്‍ഘ്യത്തെ ബാധിക്കുമെന്ന് പ്രതീക്ഷിക്കുന്നു. മാറ്റങ്ങള്‍ മില്ലിസെക്കന്‍ഡുകള്‍ മാത്രമാണെങ്കിലും, ഭൂമിയുടെ ഭ്രമണത്തെക്കുറിച്ചുള്ള കൃത്യമായ വിവരങ്ങള്‍ ആവശ്യമുള്ള കൃത്യമായ ബഹിരാകാശ നാവിഗേഷന്‍ പോലുള്ള പല മേഖലകളിലും പ്രശ്‌നങ്ങള്‍ സൃഷ്ടിക്കുമെന്ന് ഗവേഷണങ്ങള്‍ വ്യക്തമാക്കുന്നു.

Content Highlights :The Earth's rotation speed is slowing for the first time in 3.6 million years. Scientists say there has never been another period in so many years when the Earth's rotation speed has changed.